Árshátíð Íslendinga í Stokkhólmi

Um helgina var haldin árshátíð Íslendingafélagsins og var fjölmennt á staðinn og mikið stuð.  Skari Skrípó sá um skemmtiatriðin og Páll Óskar var skífuþeytir.  Haldið var veglegt happdrætti, maður gat keypt 6 miða fyrir 100 SEK en að sjálfsögðu unnu bara yfirhagsýnir menn eins og Sigurður Yngvi sem bara keypti einn miða.  Íslendingur ársins var valinn en ég man ekki hvað hann heitir, mesti hrakfallabálkur ársins reyndist hann Diddi vinur minn sem heldur uppi geisigóðri bloggsíðu (http://www.blog.central.is/oneofthemarbros), Guðrún Scheving var að sjálfsögðu valin best klædda konan og fékk nafnbótina tískulögga Stokkhólmar.

Þarna var margt nafnkunnra einstaklinga, á mínu borði kannski hjónin Sigurður og Sunna þekktust en þau eru málkunnug bæði Degi B Eggerts og Guðmundi Steingrímssyni.  Eva María Jónsdóttir þekkti ad sjálfsögðu Sunnu og fór vel á með þeim en ég sat þögull og horfði í gaupnir mér til að segja ekki eitthvað vandræðalegt en í hvert skipti sem ég tala við frægt fólk verð ég stressaður og óðamála.

 Fyrrnefndur Diddi minglaði með mér á milli atriða og þá hitti ég gamlan bekkjarfélaga úr Snælandsskóla sem búsettur hefur verið í 8 ár í Stokkhólmi með finskum sambýlismanni sínum, fágaður maður í teinóttum jakkafötum með silvurslegið hár.  Nú vorum við Diddi líka vel til hafðir, hann í dökkum jakkafötum með slifs en ég í gráum jakkafötum með rauðan, forláta silkihálsklút sem er einmitt í tísku núna.  Við ræddum um ýmis mál en svo mældi hann út Didda sem er svipbjartur maður með slétta andlitshúð og spurði hvort hann væri sambýlismaðurinn minn.

Á sunnudaginn prófaði Eyrún nýjan balletskóla og ekki af verri endanum, kennarinn heitir Sandra og píanóleikarinn Björn, stúlkurnar hlýddu vel og það var hrein unun að horfa á þessar litlu dúllur dansa og framkvæma æfingar á slá.   Síðan voru keyptir ballet skór og nú ætlar hún að prófa þetta næstu vikurnar.

 

 

Athugasemdir

[Diddi (IP-tala skráð) 13.2.2007 kl. 20:23]

Sæll félagi og til hamingju með skemmtilega síðu! Ég sé strax að þú ert maður sannleikans ... og það er gott!

Ég er sammála þér að árshátíðin var hin besta skemmtun þrátt fyrir þetta óheppilega atvik í upphafi kvöldsins. Þér að segja er ég enn ekki búinn að jafna mig á þessu og hef t.a.m. hvorki notað augnkremið né andlitskremið frá Dolce & Gabbana (sem þú veist hvað ég er hrifinn af) síðan að þetta átti sér stað!

En ég skil þó ekki hvernig manninum datt í hug að draga þessa ályktun um þig. Þú varst mjög karlmannlegur með rauða klútinn (sem er einmitt hæst móðins um þessar mundir). Ég var t.d. að horfa á FashionTV um daginn og sá ekki betur en að bæði Jean Paul Gaultier og David Beckham hafi verið með mjög svipaða klúta! 

[Þorvarður Ragnar Hálfdanarson, 15.2.2007 kl. 03:46]

Hvaða maður með réttu ráði myndi nokkurn tíma láta sjá sig með hálsklút....?